A Difusora das Letras, Artes e Ideas vén de publicar o catálogo desta última edición do Outono Fotográfico.
Para aqueles que non puidestes achegarvos ata Ferrol para ver a exposición na que participei, déixovos neste enlace a parte do libro na que aparecen os textos e as imaxes que a conformaban.
Coa chegada da tecnoloxía dixital, moitas foron as interrogantes que se abriron arredor da posible evolución do medio fotográfico. Detestada por uns e adorada por outros, a fotografía dixital non debera ser máis que un cambio nos medios técnicos empregados á hora de captar a realidade que nos rodea, pero o certo é que a súa aparición supuxo un punto de inflexión que obriga a repensar conceptos que antes estaban solidamente asentados.
Por iso é de agradecer a aparición do libro La cámara de Pandora, do fotógrafo Joan Fontcuberta, onde o autor analisa os cambios experimentados pola fotografía coa chegada do entorno dixital e os retos aos que teremos que facer fronte no futuro máis inmediato.
Para obter máis información pasade pola páxina da editorial Gustavo Gili.
Viaxar implica un desprazamento dun lugar a outro. Cando a esto lle engadimos un movemento interior atoparémonos cunha experiencia da que xa non poderemos desprendernos. Pero para eso precisamos liberarnos de prexuízos cando partimos, porque é a única maneira de poder asimilar todo o acontecido para despois incorporalo á nosa experiencia vital.
Neste segundo número da colección dezxquince, o fotógrafo Luis Barreiro convídanos a emprender unha viaxe a través dun territorio descoñecido. As imaxes deveñen en amálgama de recordos que alumean coma un facho para guiarmos a través dunha realidade que nos pode resultar allea, pero que non dista tanto da nosa.
Para máis información pasade pola páxina da editorial Fotoxoguete.
Entrei para botarlle unha ollada ás novidades en banda deseñada, pero coma ocorre sempre nestes casos, acabei unha vez máis diante do caixón das rarezas. E desta volta atopei un exemplar da revista LA + BELLA adicado por completo ao Renault 4L alá polo ano 1997.
Os editores (Diego Ortiz e Pepe Murciego) definen LA + BELLA coma “un proxecto de reflexión, acción e experimentación no mundo da edición do arte contemporáneo, que impulsa e realiza proxectos artísticos especificamente pensados para ser editados por canles e métodos alternativos ao mundo editorial convencional”.
Este proxecto articúlase en torno a tres vías diferentes: a edición da revista experimental La + BELLA, da que hoxe vos mostro o seu cuarto número, a instalación de máquinas expendedoras de produtos editoriais e artísticos, coma a BELLAMATIC, e a realización de talleres, presentacións e charlas sobre o mundo editorial.
Para obter máis información do que están a facer, pasade pola páxina LA + BELLA.
Coa publicación do décimo número da revista C International Photo Magazine, a editorial Ivorypress dá por rematado o primeiro ciclo do que deu en chamar o C Photo Project.
Durante os últimos cinco anos, esta editorial foi elaborando o que pretende ser un punto de referencia para todos aqueles que queiran achegarse á fotografía contemporánea. Nas páxinas da súa revista podemos atopar o traballo de artistas amplamente recoñecidos a carón dos que foron desenvolvidos polos que están chamados a ser os novos referentes do panorama actual.
Ao mesmo tempo, a editorial exerceu labores de comisariado de exposicións para institucións públicas e privadas e colaborou cos representantes das máis importantes coleccións fotográficas existentes na actualidade, mostrando así un apoio constante ao desenvolvemento desta disciplina.
No segundo ciclo do C Photo Project, que se desenvolverá no período 2010-2015, a editorial pretende ofrecer unha visión diferente da fotografía que se complemente coa amosada na súa revista, estando prevista a súa presentación ao longo da vindeira primavera.
Para obter máis información podedes visitar a páxina de Ivorypress.
Ás veces é preciso botar a vista atrás para saber de onde vimos e poder decidir cara onde imos. Neste libro, o fotógrafo Joan Fontcuberta fai unha escolma dos diversos textos teóricos existentes sobre a fotografía para que poidamos facer un achegamento crítico a esta disciplina. Ao longo das súas páxinas poderemos comprobar cales foron as ideas que marcaron as diversas tendencias fotográficas da man dos seus principais protagonistas, os fotógrafos.
Como xa dicía Paul Strand no ano 1923, podemos “utilizar toda a experiencia pasada, non para imitala, senón como medio para clarificar o propio traballo e avanzar nel”.
Para obter máis información podedes pasar pola páxina da editorial Gustavo Gili.
Logo dun tempo no que fun incapaz de atopar este libro entre as miñas cousas, decidín comprar un novo exemplar para recuperar as boas sensacións que tiven cando o lin por primeira vez.
Esta bitácora do pensamento, mostra de escritura transversal na que conflúen poesía e narrativa, entronca co modus operandi do fotógrafo. Porque ao final, un fotógrafo non deixa de ser un cazador de instantes. Saímos á rúa na procura daquelas imaxes que nos permiten atopar respostas a preguntas que sempre temos presentes.
Neste libro, Rafael Argullol indaga na identidade e na memoria para tratar de recuperar os pequenos momentos que dan verdadeiro sentido á nosa existencia.
Para ler de vagar en noites de insomnio.
Chegou ás miñas mans estes días o catálogo da exposición que o Círculo de Bellas Artes de Madrid lle dedicou o pasado ano á obra fotográfica de Mireia Sentís.
Resulta difícil encadrar o traballo desta fotógrafa nun estilo predeterminado, pois a propia autora considera que cada idea precisa dunha linguaxe formal específica.
Vendo as súas series fotográficas un ten a sensación de que está diante de capítulos pechados, pero unha visión de conxunto amosa un discurso fotográfico que reflexiona sobre o corpo, o entorno no que vive e a sociedade da que forma parte, cun tono poético non exento de ironía.
Do seu traballo quédome especialmente coas súas últimas series: Castillos de Castilla (2004) e Corners (2008).
Na primeira, a autora, criada en Francia, recoñece a influencia que tivo sobre a idea inicial a expresión francesa “faire des châteaux en Espagne” (facer castelos no aire), feito que acabou condicionando o resultado final. A foto que acompaña este texto pertence a esta serie.
Na serie Corners, última realizada ata o momento, a fotógrafa acompaña as súas imaxes con textos que conseguirán que cambie a nosa percepción sobre o que temos diante dos ollos.
Tiven estes días a posibilidade de observar parte do traballo de Bernard Plossu, ese gran fotógrafo francés, viaxeiro incansable, que atrapa coa súa cámara a esencia das cousas que nos rodean. Adentrarse no seu mundo supón deixarse levar por unha morea de sensacións. A fotografía coma un espazo para reflexionar sobre a existencia.
Un luxo para os sentidos.
A editorial Fotoxoguete presenta a súa nova colección dezxquince.
Está formada por libros que constan de doce páxinas interiores nas que cada autor configura un pequeno traballo a modo de conto ou poema visual. A tirada das primeiras edicións será de cen exemplares numerados. O primeiro número presenta o traballo Elviña, da fotógrafa Raquel Castro.
Para máis información podedes visitar a páxina da editorial Fotoxoguete.
Santiago R. Gavín 