Blog

PROXECTA 09

Se pasades mañá polo concello de Vilagarcía de Arousa teredes a posibilidade de disfrutar coas actividades previstas para o festival PROXECTA 09.

Logo do éxito da anterior edición, a organización repite convocatoria para tratar de consolidarse no tempo e ocupar un espazo na axenda cultural desta época do ano.

Ás 20:30 h. terá lugar no Auditorio deste concello a inauguración da exposición Our World Now 2, no que poderedes ver unha selección de imaxes dos fotógrafos da Axencia Reuters referidas ás noticias acaecidas durante o ano 2008.

E un pouco máis tarde, ás 22:30 h., comezará na Alameda a proxección nunha pantalla xigante dos traballos dos fotógrafos convidados para esta edición, que son os seguintes:

– Art in Nature, de Miguel Lasa.
– Forced Identity, de Pep Bonet.
– Compostela, un ano de Voz, de Xoan A. Soler, Álvaro Ballesteros, Sandra Alonso e Paco Rodríguez.
– Peering, da axencia de noticias Agence France-Presse.
– Camboya, de Carlos Rubio.
– Bodas gitanas, de Mónica Vila.
– In Memorian, de Gimena Berenguer.
– A derradeira matanza, de Miguel Muñiz.
– Agora non podemos parar, de José Luiz Oubiña.
– Miedo en los Grandes Lagos, de José Cendón.
– Aus Schmalegg, de Luis Barreiro.
– Individual, de Ramón Vaquero.

O proxecto imposible

.

Polaroid. Unha palabra que a moitos lles vai traer recordos doutros tempos. Toda unha revolución no mundo da fotografía. A posibilidade de facer unha foto, obtela ao instante e ver o cambio experimentado no papel. Unha pequena versión da maxia do cuarto de revelado.

Dende o ano 2007 xa non se fabrican as cámaras instantáneas, e cando un ano máis tarde a compañía anunciou a paralización da produción de película, moitos foron os que se lanzaron á procura de recambios para poder seguir disfrutando dunhas fotos diferentes. Porque no fondo non importa tanto a calidade das mesmas como as posibilidades creativas que concede esta modalidade fotográfica. Se queredes ver unha pequena mostra do que se pode chegar a facer con estas cámaras, abonda con deixarse caer pola páxina Polanoir.

Por iso, cando nos atopamos con iniciativas como a denominada The impossible project, os amantes da fotografía non podemos facer outra cousa que alegrarnos e desexarlles moita sorte diante do gran reto que se lles presenta: reinventar a película instantánea a partir de compoñentes renovados para poder lanzar ao mercado un produto que satisfaga as necesidades dos usuarios das cámaras Polaroid.

O tempo dirá se o proxecto imposible acaba sendo unha realidade.

Virxilio Vieitez

O outro día, revisando as vellas fotos da familia, acordeime de Virxilio Vieitez, un caso atípico na historia da fotografía. Este pontevedrés, nado en Soutelo de Montes, foi un de tantos fotógrafos que percorrían as comarcas coas súas cámaras para facer as fotos que lles encargaban. Lonxe de calquera pretensión artística, limitouse a fotografar diversos acontecementos ou a facer retratos que en moitos casos servirían coma nexo de unión entre os membros das familias fragmentadas pola emigración.

A forza das súas fotografías radica na singular posta en escena e na forza das miradas das persoas fotografadas. A repetición de diversos elementos como os haigas (os coches que traían os emigrantes cando retornaban ás súas aldeas) ou as motos, a ubicación das persoas na estrada ou no medio da horta, ou a inclusión de certos obxectos que atraen poderosamente a nosa atención por descoñecer os motivos polos que aparecen, acábanlle outorgando ao conxunto das fotografías unha unicidade de estilo que fai que o seu traballo sexa tremendamente singular.

Se na entrada anterior falaba da posibilidade de observar a nosa realidade dende unha perspectiva allea a nós, achegarnos á obra de Virxilio Vieitez supón situarnos no polo oposto para observar o mesmo con outros ollos, os de quen coñece de primeira man o mundo que se reflicte nas súas fotos.

Unha mirada de antano.

Inaugúrase hoxe en Lugo, na Fundación Caixa Galicia, a exposición Unha mirada de antano.

Entre 1924 e 1926, a fotógrafa e etnógrafa Ruth Matilda Anderson percorreu a nosa xeografía para preparar un traballo encargado pola Hispanic Society of America. Obtivo máis de 5000 fotografías que acompañou cunha ampla documentación, obtendo así un extenso arquivo fotográfico dos nosos costumes a principios do pasado século.

Esta exposición supón unha boa oportunidade para comprobar cal era a visión que tiñan de nós dende fóra, e ao mesmo tempo, lembrar aspectos do noso pasado máis recente que sempre axudarán a interpretar mellor o noso presente, pois un pobo que non sabe de onde vén non dispón das ferramentas necesarias para afrontar o seu futuro.

A mostra permanecerá aberta ata o vindeiro 13 de setembro. Para máis información podedes visitar a páxina da Fundación Caixagalicia.

O cazador de instantes

Logo dun tempo no que fun incapaz de atopar este libro entre as miñas cousas, decidín comprar un novo exemplar para recuperar as boas sensacións que tiven cando o lin por primeira vez.

Esta bitácora do pensamento, mostra de escritura transversal na que conflúen poesía e narrativa, entronca co modus operandi do fotógrafo. Porque ao final, un fotógrafo non deixa de ser un cazador de instantes. Saímos á rúa na procura daquelas imaxes que nos permiten atopar respostas a preguntas que sempre temos presentes.

Neste libro, Rafael Argullol indaga na identidade e na memoria para tratar de recuperar os pequenos momentos que dan verdadeiro sentido á nosa existencia.

Para ler de vagar en noites de insomnio.

Mireia Sentís

Chegou ás miñas mans estes días o catálogo da exposición que o Círculo de Bellas Artes de Madrid lle dedicou o pasado ano  á obra fotográfica de Mireia Sentís.

Resulta difícil encadrar o traballo desta fotógrafa nun estilo predeterminado, pois a propia autora considera que cada idea precisa dunha linguaxe formal específica.

Vendo as súas series fotográficas un ten a sensación de que está diante de capítulos pechados, pero unha visión de conxunto amosa un discurso fotográfico que reflexiona sobre o corpo, o entorno no que vive e a sociedade da que forma parte, cun tono poético non exento de ironía.

Do seu traballo quédome especialmente coas súas últimas series: Castillos de Castilla (2004) e Corners (2008).

Na primeira, a autora, criada en Francia, recoñece a influencia que tivo sobre a idea inicial a expresión francesa “faire des châteaux en Espagne” (facer castelos no aire), feito que acabou condicionando o resultado final. A foto que acompaña este texto pertence a esta serie.

Na serie Corners, última realizada ata o momento, a fotógrafa acompaña as súas imaxes con textos que conseguirán que cambie a nosa percepción sobre o que temos diante dos ollos.

Bernard Plossu

forgetme

Tiven estes días a posibilidade de observar parte do traballo de Bernard Plossu, ese gran fotógrafo francés, viaxeiro incansable, que atrapa coa súa cámara a esencia das cousas que nos rodean. Adentrarse no seu mundo supón deixarse levar por unha morea de sensacións. A fotografía coma un espazo para reflexionar sobre a existencia.

Un luxo para os sentidos.

dezxquince

portada2-libro-rc

A editorial Fotoxoguete presenta a súa nova colección dezxquince.

Está formada por libros que constan de doce páxinas interiores nas que cada autor configura un pequeno traballo a modo de conto ou poema visual. A tirada das primeiras edicións será de cen exemplares numerados. O primeiro número presenta o traballo Elviña, da fotógrafa Raquel Castro.

Para máis información podedes visitar a páxina da editorial Fotoxoguete.